Нийслэлийн Удирдах ажилтнуудын шуурхай зөвлөгөөнд дүүргийн Засаг дарга нар мэдээлэл хийж байгаа юм. Өнөөдрийн хуралдаанд Баянзүрх дүүргийн Засаг даргын үүрэг гүйцэтгэгч Т.Баясах мэдээлэл хийв.
Тэрбээр дүүргийн төсөв, хөрөнгө оруулалтын өнөөгийн байдал, цаашид шийдвэрлүүлэх асуудлаа танилцууллаа.
Баянзүрх дүүрэг нь 330 мянган хүн амтай нийслэлийн томоохон дүүрэг юм. Тус дүүрэгт өнгөрсөн онд улс, нийслэл, дүүрэг, орон нутгийн хөгжлийн сангийн хөрөнгө оруулалтаар 41 төсөл арга хэмжээ хэрэгжүүлсэн байна. Засаг даргын үүрэг гүйцэтгэгч ТБаясах танилцуулгадаа “Манай дүүрэг 2015 онд гэр хорооллын гудамж дундах эвдэрсэн шороон замыг хусаж тэгшлэх 3 техник худалдаж авсан. Энэ техник хэрэгслээ ашиглан 2017 он хүртэл гэр хорооллын гудамж дундах 65 км шороон замыг хусаж тэгшлэх ажлыг хийсэн. 2018 онд 120 мянган ам метр зам талбайг зассан байгаа. Нийслэлийн авто замын сангийн хөрөнгөөр орон сууцны хороолол асфальтан хучилттай авто замын 2250 ам метр талбайд авто замын засвар нөхөөсийн ажлыг хийж гүйцэтгэсэн. Гэр хорооллын айл өрхүүдийг цахилгаан эрчим хүчээр хангах болон хүчдэлийн уналтыг сайжруулах ажлын хүрээнд 2017 онд 414 өрхийг байнгын эрчим хүчтэй холбосон. Энэ онд 296 өрхийг холбохоор төлөвлөж байна. Ногоон байгууламж, хот тохижилтийн ажлын хүрээнд энэ оны хагас жилд манай дүүрэгт 6931 ширхэг мод, бут сөөг тарьсан. Манай дүүрэгт Гэр хорооллын иргэдийн бүлэг, Сууц өмчлөгчдийн холбоодын оролцоотой иргэдийн амьдрах орчныг сайжруулах 37 төсөл хэрэгжүүлсэн байна” гэв.
Засаг даргын үүрэг гүйцэтгэгч Т.Баясах дүүрэгт хийгдэж буй хөрөнгө оруулалтын ажлуудын явц, хэрэгжилтийг танилцуулаад зарим ажилд нийслэлээс анхаарч өгөхийг хүссэн юм. Ашиглалтын шаардлага хангахгүй болсон 40 дүгээр сувиллын яслийн барилгыг шинээр барих зайлшгүй шаардлага бий. Мөн Баяцээл орчмын жишиг гудамжны зам байгаа архи, согтууруулах ундаа худалдан борлуулах, түүгээр үйлчлэх цэгийн тоог багасгах хэрэгтэй байна. Өнөөдөр энэ гудамж зам дагуу нийт 86 баар цэнгээний газар бий. Иргэдээс маш олон санал гомдол ирдэг. Энэ асуудлыг шийдвэрлүүлэх шаардлагатай байна гэж танилцууллаа.
Нийслэлийн Засаг дарга бөгөөд Улаанбаатар хотын Захирагч С.Батболд “Баянзүрх дүүрэг сайн ажиллаж байгаа. Хот нийтийн аж ахуйн чиглэлээр техник хэрэгслэл авч гэр хорооллын гудамж дундах эвдэрсэн шороон замыг хусаж тэгшлэх зэргээр иргэдийн ая тухтай амьдрах нөхцөлийг бүрдүүлж байна. Бусад дүүрэг энэ туршлагыг хэрэгжүүлж ажиллах зүйтэй юм хэмээлээ гэж НЗДТГ-ын Хэвлэл мэдээлэл, олон нийттэй харилцах хэлтсээс мэдээлэв.
0
0
0
0
0
0
