Эрчим хүчний зохицуулах хорооноос 2017 онд гүйцэтгэсэн ажлыг салбарын яам болон мэргэжлийн байгууллагуудад танилцуулах тайлангийн хурал өнөөдөр боллоо. Хуралд Эрчим хүчний яам, Эрчим хүчний зохицуулах хорооныхноос гадна эрчим хүчний тусгай зөвшөөрөл эзэмшигч 80 гаруй компанийн 180-аад төлөөлөгч оролцож байна.
Эрчим хүчний салбар өнгөрсөн онд 6.08 тэрбум кВт.цаг цахилгаан, 8.9 сая Гкал дулааны эрчим хүч үйлдвэрлэн, импортоор 1.5 тэрбум кВт.цаг цахилгаан эрчим хүч худалдан авчээ. Нийт 835 тэрбум төгрөгийн борлуулалт хийж, салбарын дүнгээр 2.3 тэрбум төгрөгийн ашигтай ажиллалаа. Борлуулалтын орлого өмнөх онтой харьцуулахад 59.8 тэрбум төгрөгөөр нэмэгдсэн” гэж Эрчим хүчний зохицуулах хорооны дарга А.Тлейхан тайлангийн хурлыг нээж хэлсэн үгэндээ онцлов.
Тус хорооны дотоодын эрчим хүч үйлдвэрлэлийг нэмэгдүүлэх чиглэлээр тодорхой зохицуулалт хийж ажилласны үр дүнд дулааны цахилгаан станцууд 100.4 сая кВт.цаг эрчим хүчийг 5.1 тэрбум төгрөгөөр үйлдвэрлэж, ОХУ-аас 26.5 тэрбум төгрөгөөр худалдан авах байсан импортын цахилгааны төлбөрийг 80.8 хувиар буюу 21.4 тэрбум төгрөгөөр бууруулж, цахилгаан станцууд 2,7 тэрбум төгрөгийн ахиу орлого олсон зэрэг эерэг үзүүлэлттэй байна.
2017 онд эрчим хүчний компаниуд улсын болон орон нутгийн төсөвт 230.3 тэрбум төгрөгийн татвар шимтгэл төлсөн нь өмнөх оноос 28 тэрбум төгрөгөөр нэмэгджээ.
Эрчим хүчний үйлдвэрлэл нэмэгдэж, санхүү эдийн засгийн хэрэгцээ сайжирч байгаа ч эрчим хүчний хэрэгцээ жил дараалан өсөн нэмэгдэж байна. Цахилгаан эрчим хүчний хэрэглээ өнгөрсөн онд 2016 онтой харьцуулахад 6.6 хувиар, дулааны эрчим хүчний үйлдвэрлэл 0.9 хувиар тус тус өссөн ба өсөн нэмэгдэж буй хэрэглээг дотоодын үйлдвэрлэлээр хангах, эрчим хүчний хэмнэлтийн бодлогыг хэрэгжүүлж ажиллахын хуралд оролцогчид онцолж байв.
0
0
0
0
0
0
